Lo laboratòri Iniciativa per Occitània exprimeish la soa completa solidaritat dab los compatriòtas occitans victimas de la tempèsta violenta dens l’oèst deu nòste país, en particular en Gasconha e en Lengadòc Occidentau. Precisem que, per nosautes, aquera region non es pas lo “sud-oèst” de França, per referéncia obligatòria a l’estat francés que mespresa lo nòste pòble, mes un territòri que merita que respècten lo son nom pròpri.
Aqueste eveniment tragic provòca quauques remarcas:
1) Sembla mei que mei necessària ua reflexion suber l’enterrament de las linhas electricas, per tau de garentir la seguretat deu provesiment d’electricitat aus nòstes compatriòtas gascons e lengadocians, uei sens corrent.
2) Pr’amor deu cambiament climatic, las tempèstas atlanticas coma aquesta riscan de multiplicà’s dens lo golf de Gasconha, que poiré semblar un dia lo golf de Mexic: exigim doncas ua politica de prevencion mei ambiciosa deus riscs naturaus.
3) Tà qu’aquera politica sia eficaça, es necite que las regions occitanas pòscan estar au cap de la prevencion e que tengan competéncias aumentadas.
4) A escala grana, aquestes perilhs deu cambiament climatic necessitan ua politica mondiala mei radicala e mei solidària enter totas las nacions, entà restaurar los equilibris naturaus de la nòsta planeta.
Ara per ara, demandam ací ua auta politica, au servici deus occitans e occitanas e non pas deu sol estat centralista francés que, un còp mei, a mostrat lo son egoïsme absolut. La soa unenca prioritat es estada de restablir uei lo dia la connexion ferroviària Bordèu-París, coma se lo ligam dab la “capitala” francesa estosse mei important que la situacion deus occitans.
Qu’es clar que la sola via de sauvament tà Occitània es d’emancipà’s de França.
Free Occitània!
Iniciativa per Occitània
lo 24 de genèr de 2009
No comments:
Post a Comment