Catalonha a mand de proïbir las corridas

D'aprèp lo darrèr numèro del setmanèr valencian El Temps, lo parlament catalan seriá a mand de proïbir la tenguda de corsas de buòus sul territòri del Principat.
L'article nos assabenta d'una realitat que ne'n parlan pas gaire en França: las corsas de buòus, en Catalonha, serián deficitàrias sens los subsidis generoses versats pel govèrn espanhòl, e son mai que mai frequentadas per toristas en cèrca d'emoción.
A mai de l'interés de la proïbicion d'aquel espectacle arcaïc e crusèl en Catalonha, la proïbicion de las corsas de buòus al Principat trencariá la continuitat territoriala d'aquel passatemps barbar entre Espanha e Occitània, e demostrariá enfin l'artificialitat totala de las corridas en país occitan [los espectacles taurins autenticament occitans, talis que la corsa landesa e la corsa camarguesa, compòrtan pas la mesa a mòrt de l'animal]. Las corridas cò nòstre son una introduccion recenta e artificiala, lo resultat d'un espanholisme d'opereta que lo monde vivon coma un substitut de son occitanitat, enebida pel poder central. Compreni aquel besonh prigond de se desmarcar dels francimands, mès francament s'auriá pogut causir un altre biaish de se singularizar!
Cal doncas esperar que la proïbicion de las corsas de buòus en Catalonha siá una capitada, e que pòsca aver una influéncia sus las lutas anticorridas cò nòstre.
Un afar de seguir, alavetz!