Orn: integral Dues Espases

Un cap d'òbra! Un vertadièr cap d'òbra de la benda dessenhada. Del costat de l'inspiracion, i a (clarament reivindicada) la d'Usagi Yojimbo, e mai totas las BD d'inspiracion fantasy o quitament «rotlistica».

Coma dins las istòrias d'Usagi Yojimbo, los umans son remplaçats per animals antropomorfics, mentre que l'arquitectura dels vilatges e de las vilas, los païsatges, los vestits e los espleits son fòrça plan dessenhats e fisèls a çò que devián èsser dins l'airal occitanocatalan al sègle XIIIen. La soleta diferéncia es que dins las aventuras d'Usagi Yojimbo los noms de lòcs son los del Japon de l'epòca d'Èdo, mentre que dins Orn: integral Dues Espases en Quim Bou fa servir noms imaginaris — mès que son de bon reconéisher, coma per exemple las vilas màgers de Barka e de Masselium!

Tornar mai, coma dins las aventuras d'Usagi Yojimbo, mal despèit de la versemblança e de l'istoricitat de las situacions e dels personatges, i a un element fantastic omnipresent. Mès mentre que, dins las istòrias d'Usagi Yojimbo, l'element fantastic apareish mai que mai a travèrs la preséncia de creaturas fantasticas del folclòre japonés, dins Orn: integral Dues Espases l'element fantastic es representat per una magia inspirada als jòcs de ròtle de tipe medieval-fantastic: sortilègis, anèls magics, embreishaments, mòrts-vivents... Es la soleta critica que fariái a aquesta BD — m'auriá agradat véser una magia mai inspirada a las legendas occitanocatalanas (coma la del jòc de ròtle Aquelarre), ja que mancan pas!, puslèu qu'a D&D...

Per crompar Orn: integral Dues Espases, es aisit, sufís d'anar sul siti del sieu editor.